Artigos Recentes

Publicado o 05/04/2018

Un refuxio en Semana Santa chamado Caldoval.

Marzo foi o mellor mes da serie histórica en canto a número de visitantes, só superado por setembro, no que abriu o CIC.

679 persoas visitaron o museo romano de Mugardos durante a Semana Santa.

O Centro de Interpretación de Caldoval do Concello de Mugardos estase a converter nun recurso turístico de primeira orde. A pesar de que este ano a Semana Santa tivo lugar case un mes antes que no ano anterior, e que a meteoroloxía foi moi adversa para o turismo en Galicia; Caldoval experimentou o seu segundo mellor dato dende que abriu as súas portas. Máis de seiscentas persoas visitaron o Centro para participar das actividades programadas pola Concelleira de Patrimonio, Dolores González, para estas festividades.

O horario de apertura especial, tódolos días dende o 23 de marzo ao 1 de abril; fixo que moitas persoas puideran descubrir este importante xacemento romano da comarca. Máis do 55% dxs visitantes procedían de Ferrolterra, seguidos por un 18% procedentes do resto de Galicia, e un significativo 17’5% do resto do Estado. Tan só un 8% manifestou ser de Mugardos, polo que concluímos que foron basicamente turistas xs que se achegaron a visitar o museo.

O perfil do público corresponde nun 45% a familias con nenxs, nun 22% a parellas, e nun 17,5 % a grupos informais. Tamén é moi destacable o público escolar que visita o museo dende a posta en funcionamento do programa didáctico de Caldoval. Catro centros educativos visitaron o CIC neste mes e fixeron algúns dos obradoiros específicos que para eles se deseñou dende o Concello de Pilar Díaz. Tamén visitaron o Centro varios grupos organizados de turismo e asociacións; constituíndo algo máis do 25% do total de visitantes.